د داخلي بېځایه شویو د شمېرو د یوکېدا لومړنۍ ناسته وشوه
د مهاجرینو چارو وزارت ځینو مرکزي رییسانو او د مهاجرت نړیوال سازمان او د ملګرو ملتونو عالي کمېشنرۍ د استازو ترمنځ د داخلي بېځایه شویو د شمېرو د یوکېدا لومړنۍ تخنیکي ناسته وشوه.
د وزارت د پلان او پالیسۍ رییس مولوي محمود الحق احدي د مهاجرینو او بېځایه شویو په برخه کې د دواړو سازمانونو هلې ځلې وستایلې او زیاته یې کړه، چې په ګډه به د بېځایه شویو د کره شمېرو په څرګندولو او د دوی د ستونزو د حل په برخه کې هلې ځلې کوو.
د پورته دواړو سازمانونو استازو د مهاجرینو چارو وزارت له همغږۍ او همکارۍ مننه وکړه او ویې ویل چې د بېځایه شویو دقیق او جوت شمېر به د بېځایه شویو ستونزو ته د رسېدنې په برخه کې ګټور تمام شي.
دغه راز د وزارت مرکزي رییسانو هم د بېځایه شویو ستونزو ته د رسېدنې په برخه کې د شمېرو پر کره او دقیق څرګنداوي ټینګار وکړ.
