د ادارې او مدیریت د اساسي اصولو ښوونیز ورکشاپ پای ته ورسید
د مهاجرینو چارو وزارت مرکزي رییسانو او خپلواکو آمرینو ته د ادارې او مدیریت د اساسي اصولو تر سرلیک لاندې درې ورځنی ښوونیز ورکشاپ د وزارت د مسلکي مرستیال ښاغلي الحاج مولوي عبدالرحمن راشد له لوري د ملکي خدمتونو د انستیتوت استادانو ته د ستاینلیکونو او ټولو برخه والو ته د سندونو په وېشلو سره پای ته ورسید.
دغه ورکشاپ د روان کال د چنګاښ میاشتې پر شپاړسمه د وزارت د غونډو په تالار کې پیل او د ګډونوالو د وړاندیزونو او نظرونو په راټولولو سره پای ته ورسید.
په دې ورکشاپ کې د کاري ګروپونو د جوړولو له لارې د ادارې او مدیریت د مفاهیمو پېژندنه، د ادارې بنسټي اصول، د یوې اسلامي ادارې ځانګړنې، د مدیریت کچې، په مختلفو کچو کې د مدیرانو مهارتونه، د مدیرانو مسولیتونه او د مدیریت اصلي عناصر وړاندې شول.
د وزارت مرکزي رییسانو او خپلواکو آمرینو په دې ورکشاپ کې وړاندې شوي موضوعات ګټور او ارزښتناک وبلل.
