حقدار ته د حق په سپارلو کې د هیچا لحاظ مه کوئ
پورته خبره د مهاجرینو او راستنېدونکو چارو وزارت سرپرست الحاج خلیل الرحمان حقاني پکتیا ولایت ته د خپل سفر پرمهال له قومي مخورو او مشرانو سره په ناسته کې وکړه
په یاده ناسته کې، چې د پکتیا ولایت، ګردې څېړۍ ولسوالۍ کې د قومونو د خپل منځي شخړو د حل په موخه جوړه شوې وه، د مهاجرینو چارو وزیر وویل، د شخړو د ختمولو لپاره دوه لارې، یوه محکمه او بله صلح ده
صلح د افغاني کلتور او عنعناتو یوه ستره برخه ده او هیڅ پریکړه باید د شریعت سره په ټکر کې نه وي
په دغه ناسته کې د ګردې څېړۍ ولسوالۍ اړوند دوه قومونو، سرانې او خانخېل د خپلې شخړې د ختمولو په موخه واک او اختیار د ښاغلي حقاني په مشرۍ قومي مشرانو ته وسپاره، چې ژر به یې ستونزه حل او دواړو لوریو ته به پریکړه اعلان شي
