د هېواد په ۵ ولایتونو کې تر ۴زرو زیاتو کورنیو سره مرستې وشوې

په کابل، جوزجان، بلخ، بادغیس او بغلان ولایتونو کې څلور زره او ۴۴ راستنو شویو، بېځایه شویو، اړمنو کورنیو او کوربه ټولنو ته نغدي او خوراکي مرستې، کمپلې، روغتیايي کڅوړې او خېمې ووېشل شوې.
د کډوالو او راستنېدونکو چارو وزارت د دویمې واحدونو د راپوورنو له مخې، په کابل کې ۲۰۳ کورنیو ته دوه میلیونو ۳۱۹ زره ۴۰۰ افغانۍ او یوه خېمه، په جوزجان کې ۶۷ کورنیو ته ۹ میلیونه ۹۲ زره او ۸۲۴ افغانۍ، په بلخ کې ۱۵۰۰ کورنیو ته پینځه کمپلې، په بادغیس کې ۲۷۴ کورنیو ته ۸ میلیونه ۴۲۷ زره ۸۲۷ افغانۍ او روغتیايي کڅوړې، په بغلان کې ۲ زره کورنیو ته پینځه ډوله خوراکي توکي د همکارو او خیریه بنسټونو له لوري د یاد وزارت د اړوند ریاستونو تر پېژندنې وروسته ووېشل شوې.
د یو بل خبر له مخې،  د کابل ښار په بېلابېلو ناحیو کې د یاد وزارت تر پېژندلو وروسته د همکارو بنسټونو له لوري ۲۸۹۴ کورنیو ته ۸ میلیونه ۳۹۲ زره او ۶سوه افغانۍ او د ماشومانو او میندو لپاره د خوراکي توکو کڅوړې، په سرپل کې د زلزلې له امله پینځو زیانمنو کسانو ته ۵۰ زره افغانۍ، په ارزګان کې ۳۵ تنو ۴۲۰ زره افغانۍ ورکړل شوې.
همدارنگه د کابل د کډوالو او راستنېدونکو چارو ریاست په همکارۍ د ګروه تحقیق و دفاع حقوق بشر( HRRAC ) موسسې له لوري په کابل کې ۳۵ تنو ته د حقوقي مرستو او معلوماتي مشورو ورکولو برنامه تر سره چې د معلوماتي مشورو او حقوقي مرستو ( ملکیت حق) په اړه هغوی ته لازم پوهاوی ورکړل شو او هر کس ته د ټرانسپورټ پیسې، قرطاسیه او د غرمې ډوډۍ  ووېشل شوه.