مهاجرينو چارو وزارت کې د کار کوونکو د ارزونې د نوې ميتود د تشريح کولو غونډه تر سره شوه.
د کار کوونکو د ارزونې د نوي ميتود د تشريح کولو غونډه د مهاجرينو چارو وزارت د بشري سرچينو رياست له لورې د چارو ادارې د عمومي رياست په همکارۍ ترسره شوه.
د غونډې په پيل کې د مهاجرينو چارو وزارت مسلکي مرستيال مولوي عبدالرحمن راشد خبرې وکړې، د ارزونې په طريقه يې د مسؤلينو او کار کوونکو پوهېدل مهم وبلل، د چارو ادارې د عمومي رياست او متخصصينو څخه يې مننه وکړه او د ورکشاپ د ګډنوالو څخه يې غوښتنه وکړه هر هغه څه چې د ارزونې د نوي ميتود په اړه توضيح او تشريح کېږي استفاد وکړي او په خپلو تجربو کې يې اضافه کړي.
وروسته د بشري سرچينو رئيس مفتي مدير ګل احمدي مسؤلينو او کار کوونکو په ځانګړي توګه هغو کسانو لپاره چې نوي مقرر شوي د ارزونې د نوي ميتود د تشريح کولو برنامه مهمه وبلله، په دې اړه يې معلومات وړاندې کړل او د کار کوونکو څخه يې غوښتنه وکړه، د دغې برنامې د تدريسي بهير څخه پوره ګټه پورته کړي.
همدارنګه د اداري اصلاحاتو او ملکي خدمتونو د حقوقي چارو مرستيال ويس الدين د اداري اصلاحاتو او ملکي خدمتونو د قانون، د ملکي خدمتونو د کار کوونکو د ذاتي چارو د مقررې، د ندو د قانون، پلان، راپور، د کار کوونکو او په اداره کې د فعاليتونو د ښه والي او د کار کوونکو د ظرفيت لوړونې لپاره د ارزونې د نوي ميتود پر اهميت خبرې کړې.
ورپسې د چارو ادارې د متخصصينو د ټيم له لورې د کار کوونکو د ارزونې د نوي ميتود په اړه معلومات وړاندې شول.
ياده برنامه به دوه ورځې نور هم دوام وکړي، ترڅو د وزارت ټول کار کوونکي ترې برخمن شي.
