د کډوالو او راستنېدونکو چارو وزیر محترم مولوي عبدالکبیر د ملي راډیو ټلوېزیون د عمومي رییس ښاغلي قاري یوسف احمدي په ملتیا د راستنو شویو له څو تنو استازو سره وکتل
په دې ناسته کې، چې د کډوالو او راستنو شویو ستونزو ته د رسېدنې په اړه خبرې وشوې، ښاغلي قاري یوسف احمدي د راستنو شویو د ستونزو په حل کې د اسلامي امارت د اړوندو ادارو هڅې بې سارې وبللې او زیاته یې کړه، چې د رسنیو لخوا د عامه پوهاوي په پایله کې د اسلامي نظام تر څنګ ولس هم له راستنو شویو سره ګڼې مرستې کړې دي.
د ناستې پر دوام د راستنو شویو استازو خپل وړاندیزونه شریک کړل او د خپلو اړتیاوو په اړه یې محترم وزیر ته معلومات ورکړل.
محترم مولوي عبدالکبیر راغلیو مېلمنو ته ښه راغلاست وویل او زیاته یې کړه، چې د اړمنو لاس نیوی او ورسره همکاري د اسلامي امارت مسوولیت دی.
محترم وزیر یادونه وکړه، اسلامي امارت له راستنو شویو سره د ژمنیو مرستو لړۍ پیل کړې او راغلیو کسانو ته یې ډاډ ورکړ، چې د کډوالو چارو وزارت په همکارۍ به ورسره بېړنۍ مرستې هم وشي.
