دخواشينۍ او خواخوږۍ پېغام
په ډېرې خواشينۍ سره مو خبر ترلاسه کړ، چې د هېواد ملي مشر، جهادي شخصیت، زما او د مولوي صاحب خالص د تېر جهاد ملګری، د سولې کاروان مرستیال، د مهاجرینو چارو وزارت مخکینۍ سلاکار او اوسنی د څارنې او ارزونې رییس خدای بخلي قاري صاحب محمود شاه د ورپيښې ناروغۍ له امله له دې فاني نړۍ سترګې پټې کړي.
مرحوم قاري صاحب ددې ترڅنګ، چې یو ښه قاري او عالم و، د تېر او اوسني جهاد یوه مخکښه څېره وه، نوموړی په پاکستان کې د مهاجرینو د ستونزو د حل د شورا یو برجسته غړی و او د مهاجرینو د هوساینې لپاره یې نه ستړې کېدونکې هلې ځلې وکړې
د اسلامي امارت له بریا مخکې وروسته نوموړي د سولې او پخلاینې په برخه کې له مونږ سره نه هېرېدونکی هڅې وکړې او دده د هڅو په پایله کې د زرګونو انسانانو ژوند وژغورل شو
نوموړي هېواد او خلکو ته د یوه ریښتیني خدمتګارپه توګه په بېلا بېلو برخو کې نه ستړي کېدونکي خدمتونه کړي، چې نوم به یې تل دخلکو او ولسونو ترمنځ ژوندی وي.
زه د هغه له درنې کورنۍ سره په دې سترغم کې ځان شریک بولم او ارواښاد ته د لوی خدای ـ جل جلاله ـ له دربار څخه د مغفرت اوجنت غوښتنه کوم، الله پاک دې د ارواښاد کورنۍ له نورو غمونو څخه وساتي.
انالله واناالیه راجعون
د مهاجرینو او راستنېدونکو چارو وزیر
الحاج خلیل الرحمن حقاني
