د مهاجرینو چارو وزارت پلاوي په ترکیه کې د افغانستان اسلامي امارت له سفیر سره وکتل
د مهاجرینو او راستنېدونکو چارو وزارت د مقام دفتر رییس ښاغلي مولوي سعید احمد بنوري پر مشرۍ، د یاد وزارت او بهرنیو چارو وزارت ګډ پلاوي ترکیې ته د سفر په لړ کې تېره ورځ د افغانستان اسلامي امارت له سفیر ښاغلي شیخ صنیع الله فرهمند سره وکتل.
ښاغلي بنوري په ترکیه کې د افغان کډوالو ستونزو ته رسېدنه، په مېشتغالو کې د افغان کډوالو د ساتنې له مرکزونو لیدنه او د هغوی ستونزو ته رسېدنه، همدارنګه د دواړو هېوادونو ترمنځ د کډوالو اړوند ګډو همکاریو سند شریکول د سفر اصلي موخې وبللې.
نوموړي د افغانستان اسلامي امارت له سفیر او ډیپلوماتانو وغوښتل، چې د یاد پلاوي د سفر په موخو ترلاسه کولو کې ورسره همکاري وکړي.
ښاغلي فرهمند او د سفارت مسوولینو دغه پلاوي ته تر ښه راغلاست ویلو وروسته د ترکیې اړوندو ادارو له مسوولینو سره د همغږۍ او خبرو اترو زمینې برابرولو په برخه کې د همکارۍ ژمنه وکړه.
