د مهاجرینو او راستنېدونکو چارو محترم وزیر مولوي عبدالکبیر د پکتیکا د مرستیال والي ښاغلي مخدوم عبدالسلام سعادت په ملتیا د بغلان سربـېره د پروان او کاپیسا ولاینونو له یو شمېر مسوولینو او مجاهدینو سره وکتل.
په دې ناسته کې د پروان، کاپیسا او بغلان ولایتونو مجاهدینو او ځينو ځایي مسوولینو په یادو سیمو کې روان حالت د ډاډ وړ یاد کړ او زیاته یې کړه، چې د اسلامي امارت په هڅو، بشپړ امن حاکم دی او ولس له امنیتي ادارو سره ښه همغږي او همکاري لري.
دغو مجاهدینو اسلامي امارت ته د خپلو وړاندېزونو پر مهال د یادو ولایتونو خلکو ته د کاري فرصتونو او اقتصادي ودې په موخه د یو لړ پراختیايي چارې د پيل غوښتنه وکړه.
د ناستې پر دوام حاضرو مجاهدینو او مسوولینو د ځینو موضوع ګانو په هکله خپل نظرونه او سلا مشورې له محترم وزیر سره شریکې کړې.
محترم مولوي عبدالکبیر د بغلان، پروان او کاپیسا مجاهدیتو ته ښه راغلاست وویل او د جهادي دورې پر مهال یې د هغوي قربانۍ او هڅې د قدر وړ وبللې.
محترم وزیر وویل، چې اسلامي امارت د افغان ولس شریک ټغر دی او له توپــــير پرته هر افغان په کې حق لري.
د ناستې په پای کې محترم وزیر د یادو درېیو ولایتونو د مسوولینو او مجاهدینو ته ډاډ ورکړ چې پر وړاندېزونو به یې غور وشي او حللارې به ورته ولټوي.
