د مهاجرینو او راستنېدونکو چارو سرپرست وزیر محترم مولوي عبدالكبير د صنعت او سوداګرۍ له وزیر نورالدین عزیزي سره وکتل
په دې ناسته چې د مهاجرینو او راستنېدونکو چارو وزارت معین کلیم الرحمان فاني هم حضور درلود، پاکستان هېواد ته د اسلامي امارت پلاوي د وروستي سفر د لاسته راوړنو او لیدنو په هکله خبرې وشوې.
ښاغلي نورالدین عزیزي د نوموړي په مشرۍ اسلام آباد ته سفر له لاسته راوړنو ډک یاد کړ او زیاته یې کړه د کډوالو، د دواړو هېوادونو تر منځ پر سوداګرۍ او هلته د مېشتو افغانانو د ستونزو د حل په هکله له پاکستاني چارواکو سره مفصلې خبرې وشوې او د ستونزو د حل په اړه یې ژمنې ترلاسه کړې دي.
ښاغلي کلیم الرحمان فاني وویل، چې د پاکستان حکومت د افغان کډوالو د ستونزو حل په موخه ځينې اقدامات پیل کړي او تمه ده چې کړې ژمنې ژر عملي کړي.
محترم مولوي عبدالکبیر د نورالدین عزیزي په مشرۍ پاکستان ته د اسلامي امارت د پلاوي سفر مهم یاد کړ او زیاته یې کړه، چې اسلامي امارت د افغان کډوالو په عزت راستنېدو لپاره خپلو هڅو ته دوام ورکوي او همدارنګه په کور دننه ورته اړینې اسانتیاوې چمتو شوې دي.
د محترم مولوي عبدالکبیر په وینا چې اسلامي امارت له ټولو ګاونډیو هېوادنو سره مثبتې اړیکې غواړي او د مسایلو حل په برخه کې خبرو ته لومړیتوب ورکوي
