د کډوالو او راستنېدونکو چارو سرپرست وزیر محترم مولوي عبدالکبیر د افغانستان لپاره د چین له سفیر ژاو شینګ سره وکتل.
په دې ناسته کې ښاغلي سفیر د چین او افغانستان د تېرو څو لسیزو سیاسي او ديپلوماتیکې اړیکې مهمې وبللې او زیاته یې کړه، چې بیجنګ چمتو دی له اسلامي امارت سره د افغانستان د اقتصادي ودې او د پانګونې په برخه کې خپلو همکاریو ته دوام ورکړي.
ښاغلي شینګ زیاته کړه، چې د چین حکومت افغان کډوالو ته د ښارګوټو د آبادولو په برخه کې مرستې ته چمتو دی او پلان لري چې په افغانستان کې یو شمېر کورونه کډوالو ته ورغوي.
د ناستې پر دوام ژاو شینګ په افغانستان کې اقتصادي وده او فرصتونه د پام وړ وبلل او په وینا یې چین به له افغانانو سره خپلو همکاریو ته دوام ورکړي.
همدارنګه محترم مولوي عبدالکبیر په کابل کې د چین سفیر ته ښه راغلاست وویل، او زیاته یې کړه چې له ګاونډیو هېوادونو څخه په جبري توګه د افغان کډوالو را ایستل په کور دننه د مرستو پر رسونې اغېز کړی دی.
هغه په بېلابېلو برخو کې د چین هېواد د مرستو ستاینه وکړه او په وینا یې چې اسلامي امارت د افغان کډوالو لپاره د استوګنیزو ښار ګوټو د رغولو پلان تر لاس لاندې لري او په دې برخه کې یې د مرستندویو بنسټونو د همکارۍ د اړتیا یادونه وکړه.
د ناستې په پای کې محترم مولوي عبدالکبیر د چین سفیر ته ډاډ ورکړ چې شوې مرستې به په شفاف ډول اړمنو ته رسیږي.
