پاکستان کې د جګپوړو چارواکو او هلته د بهرنیو هېوادونو ډیيلوماتانو په شتون کې د شهید الحاج خلیل الرحمن حقاني د فاتحې او درناوي مراسم ترسره شول
د پاکستان هېواد په اسلام اباد ښار کې د افغان مهاجرینو اتشې د راپور له مخې په پاکستان کې د جګپوړو چارواکو او هلته د بهرنیو هېوادونو ډیيلوماتانو په شتون کې د لېندۍ پر درویشتمه نېټه د مهاجرینو او راستنېدونکو چارو وزیر الحاج خلیل الرحمن حقاني د شهادت په مناسبت د فاتحې او درناوي وړاندې کولو مراسم ترسره شول او په اسلام اباد کې د اسلامي امارت په لوی سفارت کې د شهید حقاني د درناوي او تعزیت کتاب کېښودل شو.
دا مراسم چې اسلام اباد کې د اسلامي امارت د سفارت سرپرست احمدخان شکیب او ځینو ډیپلوماتانو په شتون کې ترسره شول د پاکستان حکومت جګپوړو چارواکو، د سیاسي ګوندونو رهبرانو، سفیرانو او د روسیې او اندونیزیا هېوادونو لویو ډیپلوماتانو د شهید الحاج خلیل الرحمن حقاني په یاد کې د خپل تسلیت مراتب د افغانستان دولت او ملت ته وړاندې کړل.
دغه راز د افغانستان لپاره د پاکستان ځانګړي استازي صادق خان، د جمعیت علمای اسلام جګپوړي غړي صلاح الدین ایوبي، د جماعت اسلامي مشر جاجي ابراهیم او د پاکستان د بهرنیو چارو وزارت جګپوړو چارواکو د شهید الحاج خلیل الرحمن حقاني د فاتحې او ختم په مراسمو کې ګډون کړی و او د تسلیت او خواخوږۍ مراتب یې وړاندې کړل.
