د هېواد په مرکز او ولایتونو کې د مرستو راټولولو په موخه ناسته وشوه
د مهاجرینو چارو وزارت د مرستو د همغږۍ په ریاست کې د هېواد په مرکز او ولایتونو کې د مرستو د راټولولو په موخه د همکارو بنسټونو له استازو سره ګډه ناسته ترسره شوه.
په دې ناسته کې د مهاجرت نړيوال سازمان، د ناروې مهاجرت شورا، د ډنمارک مهاجرت شورا، د ژغورنې نړيوالې کمېټې او د ملګرو ملتونو د بشري مرستو د همغږۍ کوونکي دفتر استازو شتون درلود او د لا زياتو مرستو د راټولولو په اړه يې څرګندونې وکړې.
د مهاجرینو او راستنېدونکو چارو وزارت د مرستو د همغږۍ رییس شیخ عبدالرحمن رحماني وویل: په همغږۍ او تفاهم سره کولای شو خپلې موخې ته چې هغه له اړمنو سره مرسته ده ورسېږو.
هغه زیاته کړه، د ولس غوښتنه عدالت او انصاف دی او باید په عمل کې یې څرګنده کړو.
د یادو بنسټونو استازو د دې ناستې کولو موخه له مستحقو خلکو سره مرسته وګڼله او ويې ويل، اړمنو ته دې لومړيتوب ورکړل شي او د ستونزو په حل، د بې ځايه شويو او راستنېدونکو د سروې او پېژندنې په برخه کې دې موخې مشترکې وي.
دوی په راتلونکي کې د نننۍ ناستې د موخو د ترلاسه کولو په موخه د لا زیاتې همکارۍاو همغږۍ ډاډ څرګند کړ.
