د مهاجرینو چارو وزیر د ریاست الوزراء له سیاسي مرستیال سره ولیدل
د مهاجرینو او راستنېدونکو چارو وزیر الحاج خلیل الرحمن حقاني د ریاست الوزراء له سیاسي مرستیال ښاغلي مولوي عبدالکبیر سره د غوايي په (٢٧) مه ناسته وکړه.
په ناسته کې د مهاجرینو او راستنېدونکو چارو وزیر په بهرنیو هېوادونو کې د افغان مهاجرو د حج د سهم او هغوی ته د اسانتیاوو چمتو کولو په برخه کې د ریاست الوزراء سیاسي مرستیال ته معلومات ورکړل ویې وویل، افغان مهاجرین چې د حج د اداء کولو تکل لري په مکه معظمه او مدینه منوره کې د غوره استوګنځي ترڅنګ هغوی ته د استادانو بشپړې تابیاوې هم شوې دي.
هغه زیاته کړه، د مهاجرینو چارو وزارت پلان لري څو په ایران او پاکستان کې د افغان مهاجرینو حالت له نږدې وارزوي،چې اوسمهال هېواد ته له ګاونډیو هېوادونو د مهاجرینو دراستنېدو کچه زیاته شوې او هغه مهاجرین چې هېواد ته راستنېږي په سرحدي سیمو کې ورته لازم امکانات هم ورکول کېږي.
د ریاست الوزراء سیاسي مرستیال ښاغلي مولوي عبدالکبیر د مهاجرینو او راستنېدونکو چارو له وزیر څخه مننه وکړه ویې وویل، لا هم ګاونډیو هېوادونو کې ګڼ شمېر افغان مهاجرین ژوند کوي او اړتیا ده چې د هغوی د دایمي ستونزو د حل لپاره د نړیوالو ادارو په مرسته اغېزمن اقدامات وشي.
نوموړي وویل، حج ته د افغان مهاجرینو په استولو کې د مهاجرینو او راستنېدونکیو چارو وزارت هڅې مهمې دي.
ښاغلي مولوي عبدالکبیر له ټولو افغانانو څخه چې له هېواده بهر دي وغوښتل چې خپل هېواد ته را وګرځي او په خپل ټاټوبي کې د عزت ژوند غوره کړي
