د مهاجرينو چارو وزارت مسلکي مرستيال د اړمنو بېځايه شوو د وضعيت د څېړلو په موخه جوزجان ته ولاړ
د مهاجرينو او راستنېدونکو چارو وزارت تنخيکي او مسلکي مرستيال مولوي عبدالرحمن راشد دوشنبه د ليندۍ په ( ۷) جوزجان ولايت ته د اړمنو او بېځايه شوو کورنيو د وضعيت د څېړلو په موخه ولاړ.
هغه همدارنګه د مهاجرينو چارو رياست د ستونزو د څېړنو وروسته د ولايت مقام، مهاجرينو چارو رياست او همکارو مرستندويه بنسټونو ترمنځ جوړې شوې ناستې کې هم ګډون وکړ ټينګار يې وکړ، چې موسسې بايد د مهاجرينو چارو وزارت سره د ترسره شوو هوکړه ليکونو له مخې راستنېدونکو او اړمنو بېځايه شوو په برخه کې مرستې وکړي.
هغه زياته کړه، چې مرستندويه بنسټونو د مهاجرينو چارو وزارت سره د لاسليک شوي ګډ هوکړه ليک له مخې نه شي کولای چې بغير د مهاجرينو چارو رياستونو د همغږۍ څخه فعاليتونو ترسره کړي.
ښاغلي راشد د جوزجان ولايت د نورآباد د مهاجرينو ښارګوټي څخه هم ليدنه وکړه او د غاليو د پروسس د مرکز چارې يې وڅېړلې چې د (UNHCR) دفتر له لورې د (۱۵۰) زره امريکايي ډالره په لګښت په پاخه او اساسي ډول جوړيږي.
