د زلزله ځپلو لپاره د اسلامي امارت ځانګړې کمېټې پلاوي د سپېرې ولسوالۍ له زیانمنو کورونو څخه لیدنه وکړه
د کورنیو چارو وزارت د پلان او پالیسۍ مرستیال مولوي فیض الله جمال په مشرۍ د زلزله ځپلو لپاره د اسلامي امارت ځانګړې کمېټې پلاوي د خوست ولایت سپېرې ولسوالۍ کې له هغه زیانمنو شوو کلیو لیدنه وکړه، چې د زلزلې له امله ځاني تلفات نه لري البته مالي تلفات ورته رسېدلي دي
ښاغلي جمال وویل: مونږ څو ورځې د شهیدانو او زخمیانو کورنیو ته په بیړنیو مرستو رسولو بوخت وو، اوس مونږ غواړو، ټول هغه کورونه چې زلزلې زیانمن کړي سروی او په بیا رغونه کې یې هڅې وکړو
نوموړي له ټولو خیریه بنسټونو وغوښتل، چې د بیړنیو مرستو ترڅنګ اساسي ستونزې ته چې د کورونو بیا رغونه ده، هم جدي پاملرنه وکړي
د زلزله ځپلو لپاره د اسلامي امارت ځانګړې کمېټه د محترم رئیس الوزرا په لارښوونه د څو وزارتونو له لوړپوړو مشرانو جوړه ده، چې مشري یې د حوادثو د مخنیوي وزارت مرستیال مولوي شرف الدین مسلم کوي، الحاج خلیل الرحمن حقاني او مولوي فیض الله جمال یې د معاونینو په حیث خدمت ترسره کوي
دغه کمېټه د مرستو همغږي کولو، چټک کولو او په شفافه توګه زیانمنو ته د رسولو دنده پرغاړه لري
