کابل کې (٥٠٠) بېځايه شوو او اړمنو کورنيو سره د خوراکي توکو مرستې وشوې
د افغان ماشونو مانو لپاره د جرمني مرستې په نوم موسسې له لورې په کابل کې (٥٠٠) بېځايه شوو او اړمنو کورنيو سره د خوراکي موادو مرستې وشوې.
د يادې موسسې رئيس حاجي محمد عالم شهاب د مرستو د وېش پرمهال وويل: زموږ اداره له کلونو راهيسې په افغانستان کې په بېلابېلو برخو کې مرسته کوي.
هغه په هېواد کې فقر, بې کاري او د نړيوالو لخوا د پېسو کنګل کول, هغه فکتورنه وبلل, چې د افغانانو په ژوند يې ژور منفي تاثير غورځولی دی.
هغه وويل, د افغانستان د کنګل شوې شتمنۍ له کبله د ټولو بهرنيو موسساتو او خېريه بنسټونو مرستې له ځنډ سره مخامخ شوي او له نړيوالې ټولنې يې وغوښتل, چې د افغانستان کنګل شوې شتنمې ازادې کړي; ترڅو ټول خېريه بنسټونه پر وخت خپلې مرستې تر اړمنو کورنيو ورسوي.
هغه زياته کړه, په ننيو مرستو کې وړه, غوړي, وريجې, بوره, لوبيا او چای شامل دي، چې د يوې کوچنۍ کورنۍ لپاره نږدې يوه مياشت بسنه کوي.
دغه راز د کابل کډوالو او راستنېدونکو چارو رئيس قاري عبدالمتين رحيمزي د افغان ماشومانو لپاره د جرمني مرستې موسسې څخه ځانګړې مننه وکړه او ويې ويل: زموږ د هېوادوالو سره په اوسنيو شرايطو کې د ټولو داخلي او نړيوالو خېريه بنسټونو مرستې ډېر ګټورې او اړينې دي.
د هغه په وينا, تر دا مهال په زرګونو کورنيو ته د خوراکي موادو مرستې رسېدلي او دغه لړۍ دوام لري.
هغه زياتوي د کډوالو او راستنېدونکو چارو وزارت هڅه کوي د سړې هوا تر راسېدو وړاندې ټول داخلي بېځايه شوي کډوال خپلو سيمو ته انتقال کړي او اړمنو کورنيو ته پر وخت مرستې ور ورسوي
