له 200 څخه زیاتې بې ځایه شوې کورنۍ له کابل څخه خپلو مېنو ته انتقال شوې
1400کال،تلې،12مه، کابل:افغانستان
د کابل نوي ښار پارک څخه د کندز او بغلان ولایتونو (215 ) بې ځایه شوې کورنۍ په خپله خوښه خپلو اصلي مېنو ته ستنې شوې.
د کابل د کډوالو او راستنېدونکو چارو رئیس قاري عبدالمتین رحیمزي د يادو کورنيو د انتقال پر مهال وویل: په دغو کورنيو کې (132) د کندز او (83) کورنۍ د بغلان ولایت اوسېدونکي دي.
هغه زیاته کړه، چې د هرې کورنۍ لپاره، یونین ایډ او رضا کار افغان میرمنې بنسټ لخوا لس زره افغانۍ، ترانسپورټ او خوراکي توکي په پام کې نيول شوي دي.
د داخلي بې ځایه شویو د دایمي حل د چارو رئيس مولوي شمال خان عثماني وویل، له کابل څخه خپلو ولایتونو ته د بې ځایه شویو د لیږد په اړه د کډوالو چارو وزارت رهبري هوډ لري, چې ټول بې ځایه شوي کسان له دوو څخه تر دریو اونیو په لړ کې د کابل نوي ښار پارک او نورو ناحیو څخه خپلو اصلي مېنو ته انتقال کړي.
