کډوالو وزارت مالي او اداري مرستيال لغمان ته سفر وکړ
د کډوالو او راستنېدونکو چارو وزارت مالي او اداري مرستيال احمد ولي حکمي د لړم په ۲۱مه د راستنېدونکو او داخلي بېځايه شوو د بنسټيزو پروژو د ليدو او د ولسمشرۍ ماڼۍ د ۳۰۵ ګڼه فرمان پر اساس مستحقو کورنيو ته د نمرو دوېش لپاره لغمان ته سفر وکړ.
نوموړي په دې سفر کې د سيمه ييزو چارواکو، والي او ولايتي شورا رئيس سره هم ليدنه وکړه او د بېځايه شوو او راستنېدونکو کورنيو د وضعيت په اړه يې ورسره خبرې وکړې.
ښاغلي حکمي والي سره د ليدنې پرمهال وويل، په نږدې راتلونکي کې به په دې ولايت کې بنسټيزې پروژې پيل شي او هم به د ولسمشرۍ ماڼۍ د ۳۰۵ ګڼه فرمان پر اساس مستحقو اړمنو کورنیو ته نمرې ووېشل شي،چې په دې سره به په دغه ولايت کې يادو کورنيو ته اسانتاوې رامنځ ته شي.
