کډوالو وزارت په شمالي ولايتونوکې دبېځايه شوو د ځای پرځای کولو هوکړه ليک لاسليک کړ
کډوالو او راستنېدونکو چارو وزارت په بلخ، جوزجان او سمنګان کې ديونين ايد موسسې سره دبېځايه شوو دځای پرځای کولو هوکړه ليک لاسليک کړ.
دغه هوکړه ليک د لړم په ۲مه دکډوالو او راستنېدونکو چارو وزارت د پلان او پالېسۍ سرپرست مرستيال مهرخدا صبار او يونين ايد موسسې ترمنځ لاسليک شو.
ياده موسسه به د ذکر شوي هوکړه ليک پر اساس د کوچنيو سيمه اييزو زيربنياوو لکه د ټولنې دمرکزونو، روغتايي مرکزونو، ښوونځيو، پلونو،پلچکونو، ابورسولو شبکې، ظرفيت لوړولو، حرفوي او مسلکي زده کړو او ښځو سره د قابلګۍ کورسونو او سواد زده کړې په برخه کې مرستې کوي، چې ۱۲ زره او ۳۵۸ تنه د پوښښ لاندې نيسي.
د يادې پروژې مالي لګښت ۸۹ ميليونه، ۲۹۰ زره او ۲۳۴ افغانۍ کېږي، چې دالمان هېواد ( G IZ) موسسې له لورې ورکول کېږي.
همدارنګه ذکر شوې موسسه دکډوالو چارو وزارت له خوا ددې برنامو د پلي کولو نظارت او دخپلو کارونو په هرو دريو مياشتو کې راپور ورکولو مسئوليت هم لري.
