د کډوالو او راستنېدونکو چارو وزیر محترم مولوي عبدالکبیر د لويې پکتیا د جهادي څېرې او قومي مخور حاجي عبدالرحمن ځدراڼ په ملتیا له ځینو قومي مشرانو سره وکتل.

دغو قومي مخورو او مشرانو د ولس د ستونزو په حل کې، د اسلامي امارت هڅو ته په اشارې سره وویل، چې د راستنو شویو د غوښتنو او وړاندېزونو پر بنسټ ګڼو اړمنو کورنیو ته د خوارکي او سرپنا په برخه کې اړتیا وړ مرستې رسیدلې دي او په راتلونکې کې یې د ورته هڅو د دوام غوښتنه وکړه.
د ناستې په لړ کې حاضرو مشرانو او قومي مخورو په خپلو سیمو کې ځینو خدماتو ته د لاس رسي په موخه خپل وړاندېزونه شریک کړل.
محترم مولوي عبدالکبیر راغلو قومي مخورو او مشرانو ته ښه راغلاست وویل او د اسلامي نظام او ولس په اړیکو کې یې د هغوی د هڅو او ونډې ستاینه وکړه.
محترم وزیر د ولس ستونزو او غوښتنو ته رسیدنه د اسلامي نظام مسوولیت یاد کړ او په وینا یې چې د کډوالو چارو وزارت په هڅو اړمنو ته د مرستو نوې لړۍ پیل شوې او ګڼو کورنیو ته به ورسیږي.
محترم وزیر شریک شوي وړاندېزونه مهم وبلل او زیاته کړه، چې له اړوندو ادارو سره په همغږۍ به، ورته د رسیدنې لارې چارې ولټول شي.