کډوالو وزير د پاکستان سفير سره په ليدنه کې ټينګار وکړ چې په کرونايي شرايطو کې دې افغان کډوالو ته ډېره پاملرنه وشي
د کډوالو او راستنېدونکو چارو وزير نور الرحمن اخلاقي د غبرګولي په ۶مه په خپل کاري دفتر کې په کابل کې د پاکستان سفير منصور احمد خان سره ليدنه وکړه او ټينګار يې وکړ چې په کرونايي شرايطو کې دې افغان کډوالو ته ډېره پاملرنه وشي.
هغه د پاکستان له حکومت څخه مننه وکړه چې په پاکستان کې مېشتو افغان کډوالو سره په ستخو کرونايي حالاتو کې روغتيايي او لومړنۍ مرستې کوي او دوی ته پاملرنه کوي. په دغه ليدنه کې چې په کډوالو وزارت کې ترسره شوه ښاغلي اخلاقي د دواړو هېوادونو ترمنځ د سولې او يوځای والي (APAPS) هر اړخيزو خبرو ته اشاره وکړه او دغه پروسه يې د کډوالو په مديريت کې دنوي فصل پرانيستل وبلل.
د سولې او يوځای والي (APAPS) په هر اړخيزو خبرو اتروکې دواړو لوريو په پاکستان کې دمېشتو افغان کډوالو دشتون د قانوني کېدو په اړه خبرې وکړې او دکډوالو او راستنېدونکو چارو وزارت هڅه کوي ترڅو هغه افغان کډوالو چې په پاکستان کې ژوند کوي د پېژندنې د تثبت او د پاسپورتونو دوېش وروسته دافغانستان سفارت له لورې ورته په اسلام اباد کې د ويزو وهل پيل کړي.
په ورته وخت کې دپاکستان سفير منصور احمدخان کډوالو او راستنېدونکو ته د خدمتونو په برابرولو کې د همکاريو اعلان وکړ او د پاکستانۍ ويزو د اسانتياپه برخه کې يې وويل، چې د اسلام اباد حکومت چارواکي په پام کې لري چې د افغانانو نوي نسل ته چې په پاکستان کې پيدا شوي دي اوږدمهاله ويزې ولګوي.
