ننګرهار: د مهاجرینو چارو وزیر د سرخرود ولسوالۍ له طوفان ځپلو سیمو څخه لیدنه وکړه
د مهاجرینو او راستنېدونکو چارو وزیر الحاج خلیل الرحمن حقاني، چې د ننګرهار ولایت مرستیال او د وزارت یوشمېر رئیسانو یې ملتیا کوله د ننګرهار ولایت، سرخرود ولسوالۍ اړوند د طوفان له امله زیانمنو سیمو څخه لیدنه وکړه
د مهاجرینو چارو وزیر د سیمې خلکو سره په ناسته کې له دوی سره خپله خواخوږي څرګنده کړه، شهیدانو ته یې د جنت الفردوس، زخمیانو ته عاجله شفا او زیانمنو کورنیو ته یې د تسلیت مراتب وړاندې کړل
نوموړي وویل: طبیعي پېښې د الله - جل جلاله- له لورې امتحان دی او اسلامي امارت په هره سخته کې د ملت ترڅنګ ولاړ دی
ښاغلي حقاني په ٣٢ زیانمنو شوو کورنیو نغدې پیسې او د چین هېواد مرسته شوې خیمې او کمپلې وویشلې او ډاډ یې څرګند کړ، چې ټولو زیانمنو شوو کورنیو ته به د بیړنیو مرستو رسولو ترڅنګ د سرپناه جوړولو لپاره هم هڅې وکړي
نوموړي د سیمې له خلکو وغوښتل، چې د اسلامي امارت له کاري ټیمونو سره د مستحقینو په پیژندلو کې همکاري وکړي او چاته اجازه ورنکړي، چې پخپل سر د ځپل شوو کورنیو مرستې غیر مستحقو ته ورکړي او یا یې حیف و میل کړي
