د کډوالو په برخه کې د ملګرو ملتونو د عالي کمشنرۍ له مرستیال سره د مهاجرینو چارو د وزېر لیدنه

د کډوالو لپاره د ملګرو ملتونو د عالي کمشنرۍ مرستیال ښاغلي رؤف مازو او ورسره مل پلاوي د مهاجرینو چارو له سرپرست وزیر محترم مولوي عبدالکبیر سره وکتل.
په دې ناسته کې د افغان کډوالو پر وضیعت، د کډوالۍ پر دایمي حللارو، د مهاجرینو ښارګوټو ته د اسانتیاو برابرول، د افغان کډوالو د شته ستونزو په موخه له پاکستان او ایران سره د درې او څلور اړخیزو ناستو، او ګډو همکاریو په اړه خبرې وشوې.
ښاغلي مازو د مهاجرینو چارو وزیر ته د شهید خلیل الرحمان حقاني د شهادت تسلیت وړاندې کړ او نوموړي ته یې په نوې دنده کې د بریا هیله وکړه.
نوموړي وویل، که څه هم نړیوال مالي بحران د دوی په کارونو منفي اغېز کړی، خو هڅې روانې دي څو د مهاجرینو ستونزو ته د رسیدنې لپاره اړتیا وړ بودیجه راجلب کړي.
ښاغلي مازو له پاکستان او ایران څخه د افغان مهاجرینو جبري ایستل د نړیوالو اصولو خلاف او د اندېښې وړ موضوع یاده کړه او د خبرو په پای کې یې یادونه وکړه، چې د کډوالو په برخه کې د ملګرو ملتونو ادارې کډوالو ته د ښارګوټو په جوړولو کې مرستو ته تيارې دي.   
د مهاجرینو چارو وزېر د کډوالو لپاره د ملګرو ملتونو د عالي کمشنرۍ مرستیال ته ښه راغلاست وویل او د افغان کډوالو د ستونزو د حل په برخه کې یې د نړیوالو همکارو او مرستندویه ادارو هڅې وستایلې.
محترم مولوي عبدالکبیر وویل، د مهاجرینو او راستنېدونکو چارو وزارت به هڅه وکړي، چې د راستنو شویو کډوالو او کورنیو بېځایه شویو لپاره لازمې اسانتیاوې برابرې کړي او کیدونکې مرستې به په شفاف ډول اړمنو او مستحقو کسانو ته ورسیږي.
ښاغلي وزیر هېواد ته د مهاجرینو راستنول خپل لومړیتوب وباله، خو د نوموړي په وینا چې وخت او فرصت باید په پام کې ونیول شي او مهاجرین له نړیوالو اصولو سره سم پخپله خوښه راستانه شي. په ناسته کې دواړو لوریو له یوبل سره پر لاهمغږۍ او ګډو همکاریو ټینګار وکړ.