د کډوالو وزارت مالي او اداري مرستيال د کډوالۍ نړيوال سازمان د رييس سره ليدنه وکړه
د کډوالو او راستنېدونکو چارو وزارت مالي او اداري مرستيال ولي الله جلال د کډوالۍ د نړيوال سازمان IOM د رييس ښاغلي استوارت سيمپسون سره ليدنه وکړه او د راستنېدونکو د نويو معلوماتو د راټولولو د سيستم رامېنځته کولو په اړه يې خبرې وکړې.
په دغه ناسته کې چې د دوشنبې په ورځ د زمري په ۱۱مه په کډوالو وزارت کې ترسره شوه، د کډوالو وزارت مالي او اداري مرستيال دکډوالو او داخلي بېځايه شوو خلکو په اړه د هر اړخيزو معلوماتو راټولولو د سيستم په اړه وويل، د ياد سيستم نه لرل يو له هغو ستونزو او ننګونو څخه دي چې کډوالو او داخلي بېځايه شوو ته د خدماتو په رسولو کې خنډونه رامېنځته کوي. هغه زياته کړه چې د دغه ستونزو او ننګونو د حل لپاره د دقيقو معلوماتو راټولولو او د راستنېدونکو او داخلي بېځايه شوو د احصايو وړاندې کولو کې د روڼتيا رامنېځته کولو لپاره نوي او هر اړخيز سيستم ته اړتيا ده.
ښاغلي جلال د کډوالۍ نړيوال سازمان څخه غوښتنه وکړه چې د سيستم رامېنځته کولو په برخه کې دې د کډوالو او راستنېدونکو چارو وزارت سره همکاري وکړي.
د کډوالۍ نړيوال سازمان (IOM) رييس ژمنه وکړه چې په دې برخه کې به د کډوالو او راستنېدونکو چارو وزارت سره مرسته وکړي او په دې برخه کې تخنيکي ظرفيت شتون لري.
