د کډوالو او راستنېدونکو چارو وزیر محترم مولوي عبدالکبیر په خپل کاري دفتر کې د اسلامي امارت له درې تنو چارواکو سره وکتل.
په دې ناسته کې چې د معلوماتو او احصائې ملي ادارې معین، د ترانسپورت او هوايي چلند او د شیهدانو او معلولینو چارو وزارتونو معینانو حضور درلود، د اسلامي امارت د لاسته راوړنو او ولس ته د حکومت لخوا د وړاندې کېدونکو خدمتونو په هکله خبرې وشوې.
د ناستې محترمو ګډونوالو روان کال د اسلامي امارت شوي کارونه مثبت یاد کړل او زیاته یې کړه، چې د ګڼو نیمګړتیاوو سربېره حکومت توانېدلی چې له پلان سره سم خپلې موخې ترلاسه کړي.
مولوي عبدالسلام حقاني یادونه وکړه، چې د احصائې او معلوماتو ملي اداره مراجعینو ته د غوره خدمتونو په موخه د ورځې تر ناوخته کار کوي او څرګنده یې کړه، چې د احصائې ملي اداره د لاپرمختګ په حال کې ده.
دغه راز د ترانسپورت وزارت معین مولوي فیض الله جمال او د شهیدانو او معلولینو چارو وزارت معین مولوي عبدالحکیم حقاني هم په امارتي ادارو کې د لاسته راوړنو یادونه وکړه او د خپلو خبرو پر دوام یې د کډوالو ځينې اړوند موضوعات له محترم وزیر سره شریک کړل.
محترم مولوي عبدالکبیر د اسلامي امارت حاضرو چارواکو ته ښه راغلاست وویل او د امارتي ادارو د پرمختګ له امله یې د مسوولینو او چارواکو د هڅو ستاینه وکړه.
محترم وزیر وویل، چې د اسلامي نظام مسوولیتونو ته په کتو د نظام ساتنه او د ولس د ستونزو حل د اسلامي امارت لومړیتوب دی.
د ناستې په پای کې محترم مولوي عبدالکبیر د راستنو شوو او په بهر کې د افغان کډوالو ستونزو ته د رسیدنې یادونه وکړه او زیاته یې کړه، چې اسلامي امارت په لویه کچه د کډوالو ستونزو حل ته تابیا نیولې ده.
