د کډوالو او راستنېدونکو چارو وزیر محترم مولوي عبدالکبیر د ښار او کور جوړولو وزارت د معین ښاغلي شیخ مدار علي کریمي بامیاني په مشرۍ د اهل تشیع له څو تنو علمای کرامو او قومي مخورو سره وکتل.
راغلو علماوو او مخورو د اسلامي امارت لخوا د ورسره شوې همکارۍ له امله مننه وکړه او زیاته یې کړه، چې پر وخت د راستنېدونکو او زلزله ځپلو لاس نیوی د ولس د خوښۍ سبب شوی دی.
حاضرو قومي مخورو او علمای کرامو د اختلافاتو په حل کې د اسلامي امارت له پالیسۍ هر کلی وکړ او حکومت ته یې د خپلو وړاندېزونو په لړ کې، راستنو شوو ته د یوه ځانګړی ښارګوټی غوښتنه وکړه.
محترم مولوي عبدالکبیر راغلو مشرانو او علماوو ته ښه راغلاست وویل او له اسلامي نظام سره د اهل تشیع وکړو همکاري یې وستایله.
محترم وزیر وویل، چې اسلامي امارت د ټولنې اړتیاوو ته پام لري او د راستنېدونکو په ګډون د ټولو اړمنو غوښتنو ته به رسیدنه وشي.
محترم مولوي عبدالکبیر شوو وړاندېزونو ته په اشارې سره وویل، چې د حل په موخه به یې اقدام وشي او اړونده ادارې به همغږي کړي.
