د کډوالو او راستنېدونکو چارو وزارت لسګونو کارکوونکو د څلورو روزنیزو پروګرامونو څخه د فراغت سندونه ترلاسه کړل
د کډوالو او راستنېدونکو چارو وزارت د مرکزي رياستونو ۵۸ کارکوونکو د انګلیسي ژبې، کمپیوټر، د شخړو د حل او مدیریت په برخو کې د دریو میاشتنيو روزنیزو پروګرامونو د بشپړولو وروسته د یاد وزارت د کنفرانسونو په تالار کې د جوړې شوې غونډې په ترڅ کې د فراغت سندونه د وزارت مالي او اداري معین، مرکزي ريیسانو او کارکوونکي په حضور کې تر لاسه کړل.
د غونډې په پیل کې مالي او اداري معین ښاغلي شیخ کلیم الرحمن فاني د زدهکړو په اړه د اسلام د مبین دین له نظره رڼا واچوله او ویې ویل: که په اداره کې مشران خپل کشران زده کړو ته وهڅوي، یقینا،ً چې کارونه به ښه شي او د پام وړ پرمختګ به رامنځته شوی وي. محترم فاني د داسې پروګرامونو د جوړولو ستاینه وکړه او د کارکوونکو چارو رياست له مسوولانو یې مننه وکړه او زیاته یې کړه: اسلام د رحمت او مهربانۍ دین دی او د مشرانو غوره صفت دا دی، چې د نورو د هڅونې او تشویق لپاره پروګرامونه جوړ کړي، تر څو د هغوی ظرفیت لوړونه د دې باعث شي، چې چارې په ښه شان مخته ولاړې شي او په یوې ادارې کې دا ډول کړنې د ادارې د پرمحتګ سبب ګرځي.
همدا راز د کارکوونکو چارو ريیس ښاغلي عرفانالله عباد وینا وکړه او ویې ویل: د ظرفیت لوړول د دې رياست یو له مهمو دندو څخه دي او په هره اداره کې د روزنیزو پروګرامونو جوړول اړین دي. نوموړي زیاته کړه: نن ۵۸ تنه کارکوونکي د وزارت د مرکزي رياستونو څخه د څلورو روزنیزو پروګرامونو د فراغت سندونه تر لاسه کوي او دا رياست به په راتلونکې کې د ظرفیتونو د لا لوړولو لپاره نور روزنیز پروګرامونه هم ولري.
د غونډې په جریان کې د وزارت د حقوقي مطالباتو امر مفتي شاه محمد روحاني، چې یو له فارغانو څخه و د ټولو په استازیتوب خبرې وکړې او د داسې پروګرامونو جوړول یې اغېزمن او ګټور وبلل. هغه وویل: هر څوک باید د خپلې راتلونکې د ښه کولو لپاره د عصري علومو په زدهکړه کې هڅه وکړي. موږ خوشحاله یو چې په دومره لنډ وخت کې مو د انګلیسي ژبې او کمپیوټر زدهکړه وکړه، ترڅو په اداره کې زموږ په کارونو کې لا زیاتې اسانتیاوې رامنځته شي.
په پای کې مالي او اداري معین او یو شمېر مرکزي ريیسانو له لوري فارغانو ته تصدیق پاڼې ووېشل شوې او غونډه د دعوت او ارشاد ريیس محترم مولوي محمد جان خدرخېل په دعا سره پای ته ورسېده.
