د کډوالو او بېرته راستنېدونکو چارو وزیر محترم مولوي عبدالکبیر د ننګرهار ولایت د شینوارو هسکې مېنې ولسوالۍ له یو شمېر قومي مشرانو او مخورو سره وکتل.
په دغه ناسته کې راغلو قومي مشرانو د کډوالو چارو له وزیر او د دې وزارت له کارکوونکو څخه مننه وکړه، چې د راستنېدونکو بې وزلو او بېوسه کډوالو ستونزو ته یې پر وخت رسېدنه کړې، د ستونزو د حل لپاره یې لازم اقدامات کړي او د خدماتو بهیر یې په ښه ډول مدیریت کړی دی.
قومي مشرانو ټینګار وکړ چې د شینوارو ولسونه، په ځانګړې توګه د هسکې مېنې ولسوالۍ خلک، د اسلامي امارت کلک ملاتړ کوي او هیچاته به اجازه ورنه کړي څو د دوی په خاوره یا د تورخم په سیمه کې شخصي یا سیاسي پروژې پلي کړي او یا له دې سیمو څخه ناوړه استفاده وکړي.
راغلو مشرانو د خپلو یو شمېر ستونزو او وړاندیزونو شریکولو ترڅنګ، د کډوالو چارو له وزارت څخه د همکارۍ غوښتنه هم وکړه.
د کډوالو او بېرته راستنېدونکو چارو وزیر محترم مولوي عبدالکبیر د قومي مشرانو له راتګ او ملاتړ څخه مننه وکړه او ډاډ یې ورکړ چې د راستنېدونکو کډوالو ستونزې ته رسېدنه د اسلامي امارت یوه مهمه وجیبه ده.
نوموړي زیاته کړه، اسلامي امارت د افغانانو پر مخ خپلې دروازې نه تړي، بلکې د ولس خدمت او د هغوی له حقوقو څخه دفاع خپل ديني، ملي او انساني مسوولیت ګڼي.
په پای کې ښاغلي وزیر ژمنه وکړه چې د راستنېدونکو کډوالو د ژوند د ښه والي لپاره به خپلې هڅې لا پسې پراخې کړي او زیاته یې کړه چې د دوی ستونزې به له اړوندو ادارو سره شریکې شي.
