د کډوالو او بېرته راستنېدونکو چارو سرپرست وزیر محترم مولوي عبدالکبیر په چین کې د اسلامي امارت له لوي سفیر بلال کریمي سره ولیدل
په دې ناسته کې لومړی په چین کې د افغانستان لوی سفیر د افغانستان او چین د اړیکو او همکاریو په اړه معلومات ورکړل او ویې ویل، چې دغه هېواد له افغانستان سره د اړیکو پراخولو لپاره لېواله دی. په دې لیدنه کې همدا راز د اقتصادي فعالیتونو، پانګونې، د واخان لارې د فعالېدو او له راستنېدونکیو افغان کډوالو سره د مرستو په اړه بحث وشو.
د کډوالو او راستنېدونکو چارو وزیر په چین کې د افغان سفیر له هڅو د مننې تر څنګ وویل، چې اسلامي امارت د چین په ګډون له ټولو ګاونډیو هېوادونو سره ښې اړیکې غواړي او د افغانستان او چین تر منځ د شویو هوکړو په عملي کولو ټینګار وکړ.
په دې ناسته کې محترم مولوي عبدالکبیر له راستنېدونکو کډوالو سره د مرستو په زیاتېدو او پراختیا ټینګار وکړ.
