د کډوالو او بېرته راستنېدونکو چارو سرپرست وزیر محترم مولوي عبدالکبیر، په جلا جلا ناستو کې د خوست، پکتیا او لغمان ولایتونو له یو شمېر علماوو، قومي مشرانو او مسؤولینو سره وکتل.
په دغو ناستو کې د یادو ولایتونو استازو د خپلو سیمو د عمومي وضعیت، امنیتي او ټولنیزو چارو او د ولسي همکاریو پر مختلفو اړخونو بحث وکړ او خپلې ستونزې یې ورسره شریکې کړې.
راغلو مسوولینو وویل، تېر شل کلن جهاد یو دروند مزل و، خو الحمدالله افغان مجاهد ولس د الله تعالی په مرسته په بریالیتوب سره ترسره کړ او اوس به د خپل ولس د ستونزو د حل او اسلامي نظام د پياوړتیا لپاره خدمت ته چمتو دي.
د کډوالو او راستنېدونکیو چارو سرپرست وزیر محترم مولوي عبدالکبیر، د علماوو او قومي مشرانو نظریات او وړاندیزونه واورېدل او ټینګار یې وکړ، چې حکومت د ولسي اړیکو پیاوړتیا ته ځانګړې پاملرنه لري. نوموړي د علماوو او مشرانو رول مهم وباله او ډاډ یې ورکړ، چې اسلامي نظام به د ټولو افغانانو د شته ستونزو د حل او سوکاله ژوند د زمینې برابرولو لپاره به هڅې کوي.
هغه ډاډ ورکړ، چې د راغلو قومي مشرانو او علماوو له لوري د مطرح شویو ستونزو د حل لپاره به اقدامات وشي.
