د ډنمارک د کډوالو ټولنې رییسې د وزارت له مسلکي مرستیال سره وکتل
په کابل کې د ډنمارک د کډوالو ټولنې رییسې اغلې دانیه الشریف د مهاجرینو او راستنېدونکو چارو وزارت له مسلکي مرستیال مولوي عیدالرحمن راشد سره وکتل.
دا کتنه د مولوي عبدالرحمن راشد دفتر کې وشوه، چې په هېواد کې د دغه ټولنې د کاري پروژو په اړه پکې خبرې وشوې.
مسلکي مرستیال د دغه بنسټ د اداري لګښتونو د کمښت او مهاجرینو ته د پروژو د لا زیاتېدو غوښتنه څرګنده کړه.
مېرمن دانیه الشریف له حکومتي ادارو سره په همغږۍ کې د پروژو د پلي کېدو ډاډ ورکړ او زیاته یې کړه: زموږ هدف مهاجرینو ته خدمت او د کډوالۍ مخنیوی دی.
هغې په راتلونکي کې د بنسټ د اداري لګښتونو د کمښت او مهاجرینو ته د مرستو په وړاندې کولو کې د لا پاملرنې ډاډ ورکړ.
ښاغلي راشد په هېواد کې د دغه بنسټ د پروژو په پلي کېدو کې د توازن غوښتنه څرګنده کړه.
