د وزارت د مسلکي مرستیال په مشرۍ یو پلاوی بغلان ته لاړ
د مهاجرینو او راستنېدونکو چارو وزارت د مسلکي مرستیال الحاج عبدالرحمن راشد په مشرۍ یو پلاوی بغلان ولایت ته لاړ.
د دې سفر موخه د ولایتونو د مهاجرینو ښارګوټو ستونزو کتنه، د دایمي حللارو موندنه، د همکارو موسسو د مرستو راټولونه او د کړنو او فعالیتونو ارزونه ده.
ښاغلي راشد په دې سفر کې د بغلان ولایت د مهاجرینو چارو رییس محمد ابراهیم عمري سره لیدنه وکړه، د دغې ادارې کړنې یې وارزولې، هلته د ورستیو طبیعي پېښو په پار یې غمشریکي څرګنده کړه او لازمې سپارښتنې یې ورته وکړې.
د بغلان د مهاجرینو رییس وویل: تل هڅه او هاند کوو، چې راستنېدونکو ته په غوره او اسانه ډول خدمتونه وړاندې کړو.
ټاکل شوې ده، چې مسلکي مرستیال د شمال نورو ولایتونو ته هم سفر وکړي او د هغوی کړنې او ستونزې له نږدې وویني.
