د نيپال څخه دوه کورنۍ په خپله خوښه هېواد ته راستنې شوې
د مهاجرينوچارو وزارت او د ملګرو ملتونو د کډوالو ادارې استازو د کابل په هوايي ډګر کې له نيپال څخه د دوو راستنو شوو کورنيو هر کلی وکړ.
حفيظ الله او مرتضی، چې د کندهار ولايت اصلي اوسېدونکي دي، په خپله خوښه له نيپال څخه د خپلو کورنيو له غړو سره ، چې (۹) تن کېږي هېواد ته راستانه او سې شنبه د مرغومي په (۲۰) د کابل هوايي ډګر ته ورسېدل.
دغه کورنۍ اته کاله په نيپال کې مهاجرې وې او وايي، چې اوسمهال مو په هېواد کې امنيت دی پرېکړه مو کړې چې همدلته و اوسېږو او د امنيت په اړه کومه اندېښنه نه لرو.
د مهاجرينو او راستنېدونکو چارو وزارت وياند عبدالمطلب حقاني د يادو کورنيو د کړنو مننه وکړه اوله نورو افغان مهاجرو يې غوښتنه وکړه، چې خپل هېواد ته راستانه شي او له خپلو علمي او مسلکي وړتياوو څخه په استفادې د هېواد په ابادۍ او سمسور تيا کې ونډه واخلي.
هغه زياته کړه،د مهاجرينو چارو وزارت د يادو کورنيو د اړتياوو په نظرکې نيولو سره له دوی سره مرسته او همکاري کوي.
