د ادارې او مدیریت د بنسټي اصولو په اړه درې ورځنی روزنیز ورکشاپ جوړ شو
د ادارې او مدیریت د بنسټي اصولو په برخه کې د پوهاوي د کچې د لوړولو په موخه د مهاجرینو او راستنېدونکو چارو وزارت د بشري سرچینو ریاست د طرفیت لوړونې آمریت له لوري۴۰ تنو کارکوونکو ته درې ورځنی روزنیز ورکشاپ جوړ شو.
د دغه پروګرام په پيل کې د مهاجرينو او راستنېدونکو چارو وزارت مالي مرستیال شيخ کليم الرحمن فاني وويل: ډېر داسې مسایل شته چې خلک پرې نه پوهېږي چې د پوهېدا لپاره یې د يو بل همکارۍ ته اړتيا لري او د بنسټي اړتیاوو د پوره کولو لپاره ګام په ګام پوهې ته اړتیا ده او ټولو ته پکار ده، چې په خپل مسلک کې پوهه ولري.
ښاغلي فاني زیاته کړه: د هغو چارو په اړه چې تاسو ته سپارل شوي دي ځانونه پوه کړئ او دا پروګرام د کارکوونکو د ورځنيو کارونو د تطبیق او چمتو کولو لپاره مهم او اړین دی، چې کارونه په سمه توګه ترسره شي.
د وزارت د بشري سرچینو رییس مولوي سید مطیع الله خلوتي د ظرفیت لوړونې د پروګرامونو د ارزښت په اړه خبرې وکړې او زیاته یې کړه: موږ باید خپلو استعدادونو او ظرفیتونو ته زیاته پاملرنه وکړو، چې په راتلونکي کې ټولنې ته بریالي او مسلکي مدیران وړاندې کړو او د هیواد راتلونکی ښه کړو.
نوموړي د دغه روزنيز ورکشاپ جوړول ارزښتناک وګڼل او له دغه پروګرام څخه يې پر اعظمي ګټنې ټينګار وکړ.
د ادارې او مدیریت د بنسټونو اصول او مهم عناصر به یې د پوهنې ریاست له لوري درې ورځې په پریزنټیشن کې ګډونوالو ته تشریح شي.
