د قومونو یووالی د قرآن او سنت په تابعدارۍ او د یوبل په اورېدلو راځي
پکتیا ولایت کې د سویل ختیځ زون په کچه له دیني عالمانو او قومي مخورو سره په جوړه شوې غونډه کې د مهاجرینو او راستنېدونکو چارو وزارت سرپرست الحاج خلیل الرحمان حقاني وویل: افغانانو هرکله د علماو په فتوا باندې د هغو ښکرورو ښکرونه مات کړي، چې د نړۍ نور خلک به ترې په ډار کې وو
ښاغلي حقاني په ټولنه کې د علماو رول او اهمیت ته په اشارې وویل، زمونږ د ژوند په هره برخه خوشالۍ او خفګان، نکاح او جنازه کې علما موجود وي او افغانان حتا په ماشوم باندې نوم هم د عالم په خوښه ږدي
نوموړي له ولسونو وغوښتل، چې خپلې ستونزې دې د خبرو اترو، عنعنوي جرګو او علماو په توسط حل کړي
ښاغلي حقاني وویل: په تېر کې د خدمت په نوم یوازې ولسونه غولول شوي او هیڅ بنسټیز خدمات نه دي ورته ترسره شوي اوس ددې وخت دی، چې بنسټیزې پروژې پلي شي او هېواد په خپلو پښو ودرول شي
ښاغلي حقاني دسرحدونو، قومونو او قبایلو چارو وزارت لخوا جوړه شوې غونډه وستایله او په راتلونکې کې د دا ډول غونډو جوړولو او پراختیا غوښتنه یې ترې وکړه
