د مهاجرینو چارو وزارت مسلکي مرستیال د بدخشان ولایت د مهاجرینو چارو ریاست لیدنه وکړه
د مهاجرینو او راستنېدونکو چارو وزارت مسلکي مرستیال مولوي عبدالرحمن راشد بدخشان ولایت ته د خپل سفر په لړ کې د دغه ولایت د مهاجرینو چارو ریاست وکاته او د دغه ریاست له رییس او کارکوونکو سره یې وکتل.
مسلکي مرستیال وویل: له پاکستان څخه د افغانانو له جبري راستنېدنې سره اسلامی امارت وتوانید، چې د افغانانو د راستنېدنې بهیر په ښه توګه کابو او مدیریت کړي او همدارنګه د طبیعي پېښو د اغېزو له امله چې د هېواد په بېلابېلو ولایتونو کې خلک بې ځایه شوي دي د وزارت مشرتابه د څلویښت ساعتونو هڅې وکړې چې دې ته ورسیږي.
ښاغلي راشد زیاته کړه: د هېواد شمالي ولایتونو ته د ده د سفر موخه د کارونو څېړنه، د ستونزو اورېدل او ورته ته رسېدل او د چین هېواد د مرستو لېږدول دي.
د بدخشان ولایت د مهاجرینو چارو رییس مولوي محمد یونس جهادمل د دغه وزارت مرستیال ته ښه راغلاست ووایه او د دغه وزارت د رهبرۍ د کارونو ستاینه یې وکړه.
هغه وویل: موږ تل هڅه کوو، چې خلکو ته په ښه توګه خدمتونه وړاندې کړو، د هغوی ستونزې هوارې کړو او د مرستو د ترلاسه کولو لپاره لا زیاتې همکارۍ او همغږۍ ته چمتو یو.
