دکډوالو چارو وزير په ايران کې د افغانستان له نوي سفير څخه وغوښتل چې کډوالو ته دې په خپل کاري لومړيتوب کې ځای ورکړي
د ولسمشر پخوانی سلاکار او د سرحدونو او قبايلو چارو زوارت مرستيال عبدالغفور لېوال چې تازه په ايران کې افغان سفير ټاکل شوی، دکډوالو چارو وزير سره په ليدنه کې په ايرن کې د افغان کډوالو د وضعيت په اړه خبرې اترې وکړې.
دغه ليدنه د تېرې يکشنبې په ورځ د غبرګولي په ۱۹مه په کډوالو چارو وزارت کې ترسره شوه. د کډوالو چارو وزيرسيد حسين عالمي بلخي ښاغلي لېوال ته د نوې دندې دمبارکۍ ترڅنګ په ايران کې دمېشتو افغان کډوالو د وضعيت په اړه معلومات ورکړل او له هغه څخه يې وغوښتل چې د دواړو هېوادونو اړيکې داسې برابرې کړي، چې دکډوالو موضوع په لومړيتوب کې ځای ولري.
دهغه په خبره په تېرو څلور کلونو کې دکډوالو چارو وزارت د پرلپسې هڅو په پايله کې په ايران کې د افغان کډوالو د کارتونو دمودې غځولو لګښت کم شوی؛ خو په پشپړه توګه له منځ نه دی تللی.
په ايران کې دافغانستان نوي سفير ژمنه وکړه، چې دبهرنيو چارو وزارت او يوشمېر نورو سکتوري ادارو سره په څنګ کې به خپلې اړيکې په مستقيم ډول برابرې او دکډوالو چارو وزارت به په دغه برخه کې په لومړيتوب کې ونيسو.
