د ځمکو دوېش لپاره د راستنېدونکو دنوم ثبتونې لړۍ دکار پيل د اړوندو موسساتو له لورې وروستی شو
په کابل کې د ملګرو ملتونو د بشري استوګنې (يوان هبيتات ) او دکډوالۍ نړيوال سازمان (IOM) رئيسانو د راستنېدونکو دنوم ثبتونې پلان چې په راتلونکو دوو مياشتو کې پيليږي دکډوالو چارو دوزير سره شريک کړ.
دغه ناسته چې دتېرې چهارشنبې په ورځ د وري دمياشتې په ۷مه دکډوالو چارو وزارت کې ترسره شوه،پکې د ر استنېدنکوته د ځمکو دوېش په موخه دنوم ثبتونې دپرګرام پرڅرنګوالي خبرې اترې وشوې.
هغه پلان چې د يادو موسسو له لورې وړاندې شو پکې د راستنېدونکو نوم ثبتونه په راتلونکو دوو مياشتو کې پيليږي او دکار دپيل لپاره پکې پنځه ځانګړې موارد ځای پرځای شوي دي.
د اړمنو د ټاکنې سيستم، د دفترونو را منځته کول ، دکارکوونکو ګمارونه او د وسايلو برابرول په دغه پلان کې د راستنېدونکو د نوم ثبتونې دکار د پيل په توګه طرحه شوي او هوکړه شوې، چې د دري واړو ادارو تخنيکي ټيمونه به د روان کال د وري مياشتې له ۸ مې نېټې به د نوم ثبتونې د دفترونو او دکاکوونکو دګمارنې کار پيل شي.
دکډوالو او راستنېدونکو چارو وزير سيد حسين عالمي بلخي د راستنېدونکو دنوم ثبتونې دکار پيل ته په هيله مندۍ سره د نړيوالو موسسو له لورې ټاکل شوې موده ددوی لپاره وروستی چانس وټاکه.
دا په داسې حال کې ده، چې په تېره يوه اوونۍ کې د کډوالو چارو وزير څوځله ديادو ادارو مسئولين را وغوښتل او له هغو څخه يې دنوم ثبتونې دکار پيل په اړه معلومات وغوښتل.
د راستنېدونکو نوم ثبتونه او د اړمنو ټاکنه د جمهوري رياست د ۳۰۵ ګڼه فرمان او د څو ملي او نړيوالو بنسټونو له لورې پرمخ وړل کېږي، چې مشري يې دکډوالو چارو وزارت او دهغې تخنيکي همغږي د يو ان هبيتات او ای او ام ادارې پرغړه لري.
