د مهاجرینو او راستنېدونکو چارو سرپرست وزیر محترم مولوي عبدالکبیر په خپل کاري دفتر کې په کندز کې د اسلامي امارت له څلور تنو ډلګۍ مشرانو سره وکتل.
په دې ناسته کې حاضرو ډلګۍ مشرانو په اسلامي نظام کې خپلو مسوولیتونو او لاسته راوړنو ته په اشارې سره وویل، چې د اسلامي امارت د مجاهدینو هیلې پوره شوې او اوس د اسلامي نظام د پاېښت او ولس ته د خدمت هڅې کوي.
د ناستې پر دوام راغلو ډلګۍ مشرانو د کندز د مجاهدینو ځینې وړاندېزونه او غوښتنې له محترم وزیر سره شریکې کړې.
محترم مولوي عبدالکبیر راغلو ډلګۍ مشرانو ته ښه راغلاست وویل او په شل کلنه جهادي دوره کې یې د کندز د مجاهدینو قربانۍ او هڅې د ویاړ وړ وبللې.
محترم وزیر د مجاهدین تر منځ پر یووالي او اطاعت ټېنګار وکړ او زیاته یې کړه، چې اوسنی نظام د مجاهدینو په قربانیو رامنځته راغلي او د حکومت لویه برخه ځوانان دي.
د نوموړي په وینا چې د اسلامي نظام په ساتنه کې د مجاهدینو ونډه خورا مهمه ده او د اسلامي امارت زعیم د اسلامي امارت مجاهدینو ته ډېر پام لري.
د ناستې په پای کې محترم مولوي عبدالکبیر د کندز د مجاهدینو وړاندېزونو ته د رسیدنې یادونه وکړه.
