په مهاجرینو چارو وزارت کې د کاري پروسو اسانولو یو ورځنی ورکشاپ ترسره شو
په مهاجرینو او راستنېدونکو چارو وزارت کې د روڼتیا زیاتوالي، مراجعینو ته د ښو خدمتونو وړاندې کولو په موخه د کاري پروسو اسانولو یو ورځنی ورکشاپ ترسره شو.
دغه ورکشاپ د یاد وزارت د مالي او اداري معین محترم شیخ کلیم الرحمن فاني، د چارو عمومي ادارې استازي، د مرکزي رییسانو او امرینو په شتون کې ترسره شو.
په پیل کې ښاغلي فاني د کاري پروسو د اسانولو پر ارزښت ټينګار وکړ او ویې ویل: د کاري پروسو اسانول مراجعینو ته اسانتیاوې او د چارو په ترسره کولو کې روڼتیا او ښهوالی رامنځته کوي.
هغه وویل: هڅه کوو، چې کاري پروسې اسانه کړو، تر څو هېوادوالو ته غوره او چټک خدمتونه وړاندې کړو.
وروسته د چارو عمومي ادارې استازي د کاري پروسو د اسانولو څرنګوالي او ارزښت په اړه معلومات وړاندې کړل او ویې ویل: د نړۍ حکومتي نظامونه د ښو خدمتونو وړاندې کولو لپاره هڅه کوي، چې کاري پروسې اسانه کړي.
نوموړي زیاته کړه، چې د کاري پروسو اسانول د فزیکي چارو په پرتله مراجعینو ته زیاتې اسانتیاوې رامنځته کوي او له سرچینو او وخت څخه د ښې ګټې اخیستنې سبب کېږي.
په پای کې د کاري پروسو اسانولو پر ادامې، روڼتیا زیاتوالي او د غوره خدمتونو پر وړاندې کولو ټينګار وشو.
