د شاوخوا ۷ ميلونه بېځايه شوو او راستنېدونکو لپاره د سواد زده کړې په برخه کې ځانګړې بوديجه او پرو ګرامونه شتون نه لري
د کډوالو او راستنېدونکو چارو وزير سيد حسين عالمي بلخي په کابل کې (د هېواد پالو د سواد کاروان ) تر نامه لاندې د سواد زده کړې د يو کمپاين په پرانسته کې وويل، د ملي وحدت حکومت له پيله تر اوسه شاوخوا ۷ ميلونه بېځايه شوي او راتنېدونکي په هېواد کې ژوند کوي، چې د هغوی لپاره د سواد زده کړې په برخه کې ځانګړې بوديجه او پرو ګرامونه شتون نه لري.
د هغه په وينا له کومه ځايه چې د کډوالو چارو وزرات يو پالېسي جوړونکی او همغږي کوونکی بنسټ دی، دې ته چمتوالی لري، چې د کډوالو په ښارګوټو او هغه ځايونو کې چې هلته ډېر کډوال مېشت دي ورته د سواد زده کړې زمينه برابره کړي، خو په ملي کچه په دغه برخه کې ځانګړې بوديجه او پروګرامونه نشته.
د کډوالو چارو وزير د تېرې شنبې په ورځ د چنګاښ په ۲۹مه په دغه پروګرام کې روښانه کړه چې د غه وزارت مخکې د پوهنې وزارت د سواد زده کړې له معينيت سره د بېځايه شوو او راستنېدونکو لپاره د زده کړو پروګرامونو يو هوکړه ليک لاسليک کړی و،چې د ځانګړې بوديجې د نه شتون او د وزارت په کلنۍ بوديجه کې د کمښت له امله نه دی پلی شوی.
هغه زياته کړه په هېواد کې د بې سوادۍ له منځه وړل يو ملي حرکت ته اړتيا لري او ټولې دولتي او خصوصي ادارې بايد په دغه برخه کې فعاله ونډه واخلي.
په همدې حال کې د جمهوري رياست دوهم مرستيال سرور دانش د پوهنې وزارت د سواد ملي کمېټي د هڅو د يادونې ترڅنګ بې سوادي يې د هېواد يوله ننګونو او ستونزو ياده کړه.
همدارنګه د پوهنې وزارت د سواد زړه کړې مرستيال سردار رحيمې وويل، چې د پوهنې وزارت په پام کې لري چې د سواد کچه تر ۲۰۳۰ کال پورې تر ۶۰ ٪ زياته کړي.
